Raccolta di poesie pubblicata nel 1819.
Dalla prima poesia del libro:
LA DISTRAZION.
Messa in gala Siora Brigida,
Dona svelta e spiritosa,
La va un zorno a farghe visita
A una certa Siora Rosa,
Che ghe dise, compiasendose
Nel averla saludada,
Cossa mai xè sto miracolo?
Che bon vento l’à menada?
Xè un gran pezzo, né so vederghe
La rason, che no la onora;
Gala avudo qualche incomodo?
Xela forsi stada fora?
Una volta se vedevimo
O a la Nave, opur da Toni,
Al passegio su le Zatare,
Su la riva dei Schiaoni;
Se trovevimo spessissimo
Al Casin in Frezzaria,
E ogni volta per pramatica
Se faceva la partia;
Ma xè un pezzo, ghe lo replico,
De sto ben che la ne priva,
Che la fa che no se sapia
Se l’è morta, o se l’è viva.
Tuti tagia, la se imagina,
I tabari zo de Ela;
Se domanda da ogni Socio:
Cossa fala, indove xela?
Dove xè la Siora Brigida,
Che xè tanto che no vien?
Che per caso la sia in colora?
Che la staga poco ben?
– Grazie, grazie – cortesissima
Ela alora ghe risponde
– Espression che mi no merito,
E che proprio me confonde.
Vegnarò, no la se indubita,
Tornaremo a star insieme
Co avarò condoto a termine
Do tre intrighi che me preme;
Ma anca mi son compatibile
Perché ò avudo da soffrir
De le cosse dispiacevoli
Quanto mai che se pol dir.
Scarica il libro:
